Monthly Archives: January 2014

التزحلق فوق البركان

Standard

ناس كتير فى مصر تسمع عن الساند بوردينج (أو التزحلق ع الرمال) خصوصاً اللى راحوا سيوة أو الواحات البحرية قبل كده … حتة خشبة بتقعد عليها (أو تقف … أنت ولياقتك بقى!)  وأنت فوق تلة عالية من الكثبان الرملية … وسيب نفسك … هتتزحلق بسرعة جداً وفى خلال ثوانى هتلاقى نفسك تحت. وجدع اللى يطلع فوق تانى عشان يكرر اللعبة. المشهد بالنسبة للكسالى أمثالى عبثى بشكل لا يطاق … أسطورة سيزيف … اللى عاقبته الآلهة لسبب ما مش فاكراه ففرضت عليه انه يدفع صخرة عالية من سفح جبل لقمته … بعدين الصخرة تقع من الناحية التانية فينزل يجيبها ويزقها للقمة تانى … وهكذا. عبث!

  ده عن العبث … أما الجنان الرسمى، فهو ان فيه ناس بتعمل الموضوع ده فى بركاااان!! ايوة … فيه ناس فى مكان ما على الكرة الأرضية اتسلقوا بركان  ووقفوا على الحافة بتاعته واتزحلقوا … المكان ده هو جبل موجود فى بلد اسمها “نيكاراجوا” تقع بين أمريكا الشمالية وأمريكا الجنوبية  … ارتفاعه 726 متر  .. واحنا بنتكلم عن بركان أكتيف … انفجر 20 مرة قبل كده آخرهم كان سنة 1999 … شغال يعنى وبينفجر كده كل فترة ويطلع حمم وكده … أومال الناس تتزحلق على ايه؟ مش لازم الحمم دى تسيح الصخور كده وتعمل شغل حلو عشان جوانب الجبل تبقى زلقة شوية ومناسبة للتزحلق؟

 السرعة اللى بيوصلوا ليها هنا قد تصل ل 50 كم/الساعة … و الصخور البركانية طبعاً الإحتكاك بتاعها أعلى بكتير من الثلج أو الرمال، قعر البورد الخشب بيكون مبطن بطبقة رفيعة من الحديد … ولتقليل الاحتكاك أكتر وأكتر .. بيلزقوا طبقة رفيعة من الفرومايكا فوق الحديد … بس دى بتتحرك بسرعة من حرارة الاحتكاك فلازم تتغير كل يوم أو بعد مرتين من الزحلقة.

طبعا احنا بنتكلم عن صخور بركانية … صحيح هى هشة وسهلة الكسر بفضل تعرضها لدرجات الحرارة الهلامية للبركان … لكنها برضو بتكون حادة جداً … تقطع أى حاجة بسهولة … لذلك “المتزحلقين”  بيلبسوا بدلة كاملة بخواص حماية، ونضارات لحماية العينين، وقفازات … كأنهم راكبين موتوسيكل ريس بالظبط.

p2194122

31191-748-500

Advertisements

Standard

زى ما قالوا لنا فى المدرسة  .. جرس برج الساعة (برج اليزابيث) الشهير ب “بيج بين” يعتبر من أشهر المعالم السياحية فى مدينة لندن …  الجديد بقى، ان اعتباراً من سنة 2010 زيارته بقت مقصورة على المواطنين الإنجليز فقط دون السياح؟!! الأغرب بقى انك لو انجليزى برضو مش سهل تاخد الأتوبيس أبو دورين ده وتروح كده عادى … لازم حضرتك، غير ان يكون معاك الجنسية الإنجليزية طبعاً، تكتب جواب (ايوة .. تكتبه بخط ايدك) وتبعته للنائب المنتخب لمنطقتك فى البرلمان … ولازم كمان تبعت تحجز موعد للزيارة قبلها بثلاثة شهور ع الأقل … والأماكن محدودة.

بالمناسبة، حد عارف ليه سموه بيج بن؟

Big Ben